माघ १५ – भरतपुर चितवनमा अन्तर्राष्ट्रियस्तरको क्रिकेट रङ्गशाला बन्ने तय भएपछि देशसंगै चितवनबासीले गर्व महसुस गरिरहेका छन् । धुर्मुस–सुन्तली फाउण्डेशनले निर्माण गर्न लागिरहेको क्रिकेट रङ्गशाला निर्माणको सम्पुर्ण तयारी पुरा भएको छ । उक्त रङ्गशालाको औपचारिक घोषणा भोली (बुधबार) काठमाडौंको राष्ट्रिय सभागृह, भृकुटीमण्डपमा प्रधानमन्त्री केपी शर्मा ओलीले गर्दैछन् । चितवनमा देशकै पहिलो अन्तर्राष्ट्रिय मापदण्डको बहुउद्देश्यीय, मौलिक, गौतम बुद्ध अन्तर्राष्ट्रिय क्रिकेट रङ्गशाला निर्माण हुन लागेको हो । सोही कार्यक्रममा फाउण्डेशन र भरतपुर महानगरपालिकाबीच सहमतिपत्रमा हस्ताक्षर समेत गरिँदै छ ।
फाउण्डेशनका अध्यक्ष सीताराम कट्टेल (धुर्मुस) का अनुसार महानगरपालिकाले उपलब्ध गराउने २० बिघा छ कठ्ठा जग्गामा रंगशाला बन्नेछ । रंगशालामा क्रिकेटसँगै अन्य विधाका खेलहरू पनि खेल्न सकिने गरी निर्माण गरिने छ । सो रंगशालालाई एकेडेमिका रूपमा विकास गरिने लक्ष्य राखिएको छ ।सो जग्गा रंगशाला निर्माणका लागि दुई विश्वविद्यालय र भरतपुर महानगरपालिकाबीच यस अघि नै सम्झौता भइसकेको छ । सामाजिक क्षेत्रमा सक्रिय फाउण्डेशनले नेपालमा रंगशाला निर्माण गर्ने जनाएसँगै स्वदेशी र विदेशी नेपालीहरू उत्साहित भएका थिए । कतिपय देशमा रङ्गशाला निर्माणका लागि रकम सङ्कलन समेत थालिएको थियो ।
औपचारिक घोषणा र सम्झौतापछि स्वदेश र विदेशमा रहेका नेपालीसँग आर्थिक सहयोग जुटाइनेछ ।सरकार र जनताको सहभागितामा अन्तर्राष्ट्रियस्तरको पहिलो रङ्गशाला नेपालमा बन्ने भएको हो । रङ्गशालाको गुरुयोजना बन्दै गरेकाले के कति खर्च र समय लाग्ने भन्ने विषय घोषणा कार्यक्रममा नै गरिनेछ ।राष्ट्रिय गौरवको यस अभियानमा सबैलाई साथ र सहयोगको लागि फाउण्डेशनले आह्वान गर्दै आएको छ ।
कलाकारिताबाट समाजसेवामा लाग्नुभएका कट्टेलको नेतृत्वको फाउण्डेशनले यस अघि एकीकृत नमूना प्रहरी बस्ती काभ्रे, एकीकृत नमूना गिरानचौर बस्ती सिन्धुपाल्चोक, एकीकृत नमूना मुसहर बस्ती महोत्तरी र एकीकृत नमूना सन्तपुर बस्ती रौतहट निर्माण गरिसकेको छ । ती बस्तीमा ३२० बढी परिवार बसोबास गर्दै आएका छन् ।यी अभियान पुरा भएसंगै फाउण्डेशनले क्रिकेटमा भईरहेको उपलब्धीलाई हेर्दे क्रिकेट रंगशाला निर्माणका लागि प्रक्रिया अगाडी बढाएको थियो ।
कृपया सक्दो सेयर गरिदिनुहोला ।
गौतम बुद्ध अन्तर्राष्ट्रिय क्रिकेट रंगशाला घोषणा
धुर्मुस सुन्तली फाउण्डेशन मार्फत भरतपुर चितवनमा देशकै पहिलो अन्तर्राष्ट्रिय मापदण्डको बहुउद्देश्यीय, मौलिक, गौतम बुद्ध अन्तर्राष्ट्रिय क्रिकेट रंगशाला निर्माण गर्ने अठोट लिएका छौं । सो को भोली ठिक १:३० बजे राष्ट्रिय सभागृह, भृकुटीमण्डप बाट घोषणा गर्दैछौं । सम्पुर्ण शुभचिन्तक, सहयोगी मन, सञ्चारकर्मी महानुभावहरुलाई उक्त ऐतिहासीक समारोहमा उपस्थितीको लागि सादर निमन्त्रणा गर्दछौं ।
‘सम्बृद्धि सम्भव छ हाम्रै पाला, बनाऔं मिलि अन्तर्राष्ट्रिय क्रिकेट रंगशाला’
‘राष्ट्र निर्माण, तपाई हाम्रो अभियान’
धुर्मुस सुन्तली फाउण्डेशन
No comments:
Post a Comment